HUAWEI P10 – 「模擬淺景深」加「黑白」加「人像模式」,影相真係好明顯勁過 iPhone 好多

HUAWEI P10 – 「模擬淺景深」加「黑白」加「人像模式」,影相真係好明顯勁過 iPhone 好多


講起雙鏡頭手機,今時今日大家梗係第一時間醒起同 Leica 合作嘅 HUAWEI,但其實曾幾何時都走在最前嘅 Help This Company 都有雙鏡頭手機,但可惜捉到鹿唔識脫角,出左一款就唔再出,結果今時今日不但唔走在最前,更加係敬陪末席,就算放番個雙鏡頭落最新款嘅手機到,都唔能夠 Help That Company。

言歸正傳,HUAWEI Honor 6 Plus作為品牌旗下第一部雙鏡頭手機,淺景深效果雖然唔錯,但始終係剛剛起步,相片質素只於能用水平,遠不到驚艷,但隨著手機一代接一代,今時今日嘅 HUAWEI 雙鏡頭已經來到驚艷嘅地步,影出來嘅相唔單止唔失禮,仲會被人問一句「E.. 張相用相機影嫁?」。

石先生今次同大家講嘅係最新 Huawei P10,規格係 5.1 吋 1080p 螢幕、前置指紋識別、Kirin 960 八核心處理器、4GB RAM、64GB 儲存空間、後置 2,000 萬像素黑白鏡頭配 1,200 萬像素彩色鏡頭,支援Hybrid Zoom雙攝變焦及光學防震、前置 Leica 800 萬像素鏡頭、雙卡雙待支援 LTE Cat 6、3,200mAh 電池並支援 HUAWEI SuperCharge 快充。

Screenshot_20170409-044036

IMG_20170407_175822
講完悶到爆,但又有啲重要嘅硬體規格,石先生梗係同大家講下用 Huawei P10 最重要因素相機啦!今次 P10 嘅相機同過去好似上年年底推出嘅 Mate 9 同樣採用Leica雙鏡頭,但就有兩個功能上嘅轉變。

第一係加左人像模式,「人像模式」透過3D面部檢測、智能補光、膚色增強等多種技術,全面提升人像肌膚,立體燈光令輪廓更清晰鮮明,只要你選擇「人像模式」,P10 就識幫你自動跟人樣貎對焦,你仲可以係右下角選擇肌膚程度。

好似上面呢張相咁,就係用 P10「人像模式」影出來,你可以見到 P10 係模擬淺景深呢方面已經做得好好,除左 陳美茵 Audrey Chan 外,其他位置全部都做左淺景深效果,睇落自然得來也都無咩穿崩位。

IMG_20170407_175657

P10 嘅「人像模式」同以往嘅淺景深模式係算法上除左面部檢測之外,其實都改多左野,就係會加強相片嘅光亮度、對比度及飽和度,令成張相睇來更靚,更加有一種夢幻嘅感覺。

上面呢張 Audrey 係「珍寶肉食公司」門前影嘅相,就係用左無淺景深效果嘅「人像模式」,你可以見到相嘅光亮度、對比、飽和都明顯調高左,再疑似有少少黑色,令主題更突出。

相反,下面呢張就係 P10 普通模式下影嘅相,你見到整張相片嘅顏色都歸於平淡,追求真實環境嘅顏色,Audrey 嘅臉孔係陽光底下也都呈現番一啲陰影,唔會有全白面磨皮效果。其實今次P10嘅Leica前置鏡頭都有「人像模式」,鍾意自拍就最適合。

IMG_20170407_175651

石先生講到 Huawei P10 影人咁正,P10 雙鏡頭又係有無缺點呢?咁又唔係,因為 HUAWEI 模擬淺景深算法,需要用到兩枚後置鏡頭拍攝返來嘅影像重疊來計算,所以係一啲太近、太遠或者太細嘅位,兩枝鏡頭影出來嘅影像相同,算法就比較難去計到,也都會出現模擬化失敗嘅情況。如果你讀過基本嘅物理,應該大概明白係咩一回事。

好似下面呢張直身嘅 Audrey 相咁,影嘅時候本身想突出 Audrey 嘅腰線,所以左手就向下垂直,留番一個位係腰同手之間,但因為呢個位實在係太細,所以 P10 係模擬嘅時候無法識別呢個位置,所以就有摸擬化失敗,變左清晰可見嘅情況。

為左唔好出現呢種情況,石先生影相嘅時候就唯有就一就,要求 Audrey 張手貼番埋個身到,令手機唔會出現計算唔到嘅情況。因此,如果你想影一張靚靚人像或者係模擬淺景深嘅時候想要完美一啲,最緊要就係主體中間唔好有太多細位,儘量要將個人貼哂身,咁就萬無一失啦!

IMG_20170407_175506

IMG_20170407_175957
張手貼番埋身,咁影出來嘅模擬淺景深效果就萬無一失。

除左剛才講嘅「人像模式」外,今次 P10 仲有一個大突破,就係連「黑白模式」都有「淺景深效果」,也都有「人像模式」,呢樣野真係完全估佢唔到。

就咁聽落你可能覺得「黑白嘅人像模式」無咩特別,但石先生真實影落發覺黑白影得仲靚過彩色。好似下面呢張相咁,由高影落去,人樣清晰,膊頭以下到地下慢慢模擬淺景深,感覺真係好似真係用單反大光圈定焦鏡影咁樣,肯肯定靚過用彩色影。

IMG_20170407_180118

點解會咁呢?你望真少少下面張相就明。P10 用「黑白模式」影嘅相仲「利」過用彩色,好似下面呢張相咁,Audrey 嘅眼睫毛唔駛放大睇都勁清晰,而且係黑白模式下無磨皮,面容每一個部份都好細膩,配合埋模擬淺景深效果,成張黑白相好出,拿住某隻牌子嘅單反定焦鏡都未必影到出來。

對於 HUAWEI 雙鏡頭嘅黑白模式,好多人以前覺得無咩用,但今次黑白支援埋「人像模式」及「模擬淺景深」效果後,實用程度大增。更重要係 P10 規格本身已經唔差,八核、4GB RAM、64GB 儲存再加指紋同快充,如果鐘意影相嘅話,真係無咩理由唔揀 P10,因為佢影相真係有好大優勢。

華為消費者業務 CEO 余承東每次發佈會都會話 HUAWEI 手機影相好過 iPhone,以前無人信,覺得佢自吹自擂;到後來出左雙鏡頭有淺景深,再加埋黑白影相開始有得比拼,互相爭論下;到今次 P10 將「模擬淺景深」再混合埋「黑白」來現,真係好明顯勁過 iPhone,根本唔駛鬥。最後,送多張街市黑白相俾大家。
IMG_20170407_180224IMG_20170407_180446

(此文章授權轉載自合作夥伴stoneip.info




Categories: StoneTalk, 手機測試



相關手機規格




   編者   

尤里 @MobileMagazine

尤里@Mobile Magazine總編 本人是智能電話狂人,玩轉晒所有系統設備,最熟悉Root機、刷Rom、手機優化等。創立網站的目的是想教識用家如何玩盡手機系統,發揮出智能手機的真正樂趣。網友們如何有刷機、Root機及優化上有問題,可以 facebook專頁及GOOGLE+專頁留言